【樂人專欄:音遊百書】 「節日限定」變奏曲-伊利沙伯

O 2018/12/23    瀏覽: 485 次

「節日限定」變奏曲
 

話咁快就十二月啦,意味住響樂人谷寫《音遊百書》都將近一年了(證明了我的的產量係何其低⋯⋯),想在此多謝一直以來樂人谷谷主的協助、唔同遊戲谷同埋音樂谷既朋友,所俾我既資訊同埋IDEA、我未婚夫無限量既支持、仲有會禁入黎睇我文章既讀者 — 您。

 

話咁快就十二月啦,又到聖誕~又到聖誕~響遊戲世界入面,好多作品都會間中出一啲季節性更新:而「聖誕節」係其中一個機乎係必定會出現更新既主題。對於音樂人黎講,呢啲係一啲唔會響課本上出現既學習CHANCE:因為好多遊戲既音樂,會為聖誕節特別做一個「變奏曲」版本。

 

變奏曲;用物質啲既例子就好似 iPhone 咁,本體都係一個賣得極貴又好多人鍾意既智能手機。不過佢會有唔同版本,例如而家最細部既 iPhone SE,上去有正宗「本體」iPhone XS,功能稍為無本體咁高階既 iPhone XR,又有大螢幕版既 iPhone XS+ ⋯⋯ 大家都可以話係一眼就望得出係 iPhone,但佢地又各有小小不同;「變奏曲」就係古典音樂響三百年前左右做緊 iPhone 做緊既事情。(利申:歡迎蘋果廣告部到本文章末端透過電郵找我哦~)

 

古典音樂界既變奏曲最出名既應該不外乎莫扎特的《小星星變奏曲》。因為小星星呢首民謠/兒歌應該無人唔識,所以莫扎特好似我而家既歲數咁上下既時候,年紀輕輕就為左呢首歌做左十二個變奏版本。

 

樂人谷谷主本身就係一個會開直播教樂理既老師,所以我區區一個作家就唔響度拋太多書包了。不過透過五線譜上對比一下變奏曲既主旋律,同變奏旋律,係可以搵得番個形。我搵來主題同埋第八變奏段落,會見到莫扎特係一個一個小節對個主題同埋變奏旋律。

小星星--主題


小星星--第八變奏

 

睇唔明五線譜既讀者係唔洗擔心,因為老老實實,聽係易過睇譜。所以為大家搵來既係羅馬尼亞既女鋼琴家 Clara Haskil 既版本,你可以聽下成首歌,感受下變奏曲聽落去感覺如何。

 

而且唔一定係古典音樂,遊戲音樂好多時候都會做類似變奏曲既嘗試。聖誕節之所以特別,就係因為復活節無復活歌、萬聖節無萬節歌、中秋節鄧麗君首歌都唔算係中秋歌; 但聖誕節,有、聖、誕、歌!而聖誕歌都算係聖誕節入面一個不能缺少既「元素」。唔計商業考慮,好多遊戲商都會響節日前後做一啲「應節」既特別內容。

 

不論係一年三百六十五日長駐玩家,定係因為「節日限定」四隻字再玩番隻遊戲既玩家,大部分都會對遊戲主題曲十分熟悉,所以做變奏起上黎,係比起播Mariah Carrie呢啲知名(又年年播)既聖誕歌,更有親切感同代入感。如果在場有音樂心理學家,應該可以就用呢個設定寫到篇論文。

 

講咁耐等我搬啲例子上黎:相信大家都聽過一款非常「長青」線上多人對戰遊戲《英雄聯盟》。先唔理佢會(好識賺錢地)出一啲聖誕特別版既課金內容之外,仲會將遊戲登入畫面既背景音樂轉成聖誕版。我為大家搵來 2013 年既版本,對比平時既登入/主題音樂,大家可以聽到,雖然個主題曲旋律無變,但成個節日氣氛有幾唔同。

 

 

我知道我既文章唔止有音樂人睇(多謝!),如果你自問真係無乜音樂底,又或者響以上例子,都真係聽唔出原曲同變奏曲既內容,Don’t Worry!我都有啲「明顯」小小既例子俾你聽下,仲包你認得出本身係咩歌。呢首歌主角係《英雄聯盟》入面一隻雪怪造型既非戰鬥角色 Poro。

 

唔知各位音樂人覺得呢種(嚴格黎講)算唔算係變奏曲呢?

最後,呢篇應該係 2018 年我在樂人谷最後一篇投稿啦~順道度祝大家聖誕快樂!除非你有在Twtich睇我直播打機,或者 Facebook #NowGoPractise 活動睇我練琴既話,2019年再見啦~!
 

伊利沙伯
 

聯繫作者

電郵:yugameyumusic@gmail.com

個人網站:https://www.elizabeth-yu.com

— YouTube:https://www.youtube.com/yugameyumusic

— 廣東話 YouTube : https://www.youtube.com/channel/UCw48_DfTBcWVZP7IjyGW8EQ

— Instagram: https://www.instagram.com/yugameyumusic

Twitch : https://www.twitch.tv/yugameyumusic

Medium : https://www.medium.com/@yugameyumusic

 

想為子女找個好的音樂導師?
請用本頁上方之「樂人搜尋」列或是進入「樂人頻道」頁面,尋找各區的樂器導師,不經中介直接與導師聯繫及查詢,快捷又方便。

伊利沙伯

辜負了母親送去英國讀法律的期望,從音樂系畢業。天生任性倔強腹黑。發現遊戲音樂比電影音樂更有變化及感染力,從此墜入二次元世界和並獲得宅女屬性。最喜歡管弦樂作品的層次感和團隊精神。也非常欣賞靈活使用樂器特性而變得生動有趣的曲目。現時從時樂團指揮和音樂配件訂購等工作外,也活躍於Twitch遊戲直播及YouTube頻道,目標是成為香港遊戲音樂界的面孔。

所有文章